一年一度嘅渣打馬拉松噚日舉行，今年總共有成7萬幾人參加，原來當中亦不乏上市公司高層。噚日鴻福堂（1446）行政總裁司徒永富原來都有參與半馬賽事，仲咁啱俾大台揀中做訪問，問吓呢位參賽者心情。
司徒永富戴住橙黃色頭巾，仲着埋印有公司大大隻logo嘅紅色運動衫，一身造型咁sharp醒，難怪會俾記者揀中做訪問。佢就同華華講，噚日係喺西隧口咁啱俾記者捉住嚟做訪問，原來佢已經跑過渣馬6、7年，之前仲參與過全馬賽事，不過今次就玩吓半馬算了。不過佢成績都算不錯，喺3個鐘內完成整個賽事，佢話對成績感到滿意，而跑完仲同同事一齊影大合照。
除了佢之外，原來雅居樂（3383）主席陳卓林同副主席陸倩芳都有一齊跑馬拉松，不過佢就冇司徒永富着得咁搶眼了，只係換上大會衣服。佢兩個就揀咗跑10公里賽事，據聞陳卓林平日都有玩開長跑同打golf，今年佢成績仲好過舊年㖭。
李華華